Banka e Shqipërisë u kërkon bankave të nivelit të dytë që të tregojnë vetëpërmbajtje në rritjen e normave të interesit për kreditë. Shqetësimi shprehet në raportin e fundit të stabilitetit financiar, ku BSH vlerëson se interesat e rritura mund të përkthehen në një rrezik të shtuar për kredimarrësit dhe shtim të huave me probleme. Pjesa më e madhe e kredive afatgjata, si për individë ashtu edhe për biznese nuk janë me norma fikse interesi, por me norma të ndryshueshme që zakonisht rishikohen çdo vit. Gjatë këtij viti, interesat e kredive janë rritur ndjeshëm nga bankat e nivelit të dytë, që kanë reflektuar ndërhyrjet e bankës qendrore me rritjen e normave bazë si mekanizëm për të luftuar inflacionin. Megjithatë, raportet financiare të bankave të nivelit të dytë sugjerojnë se rritja e normave të interesit prej tyre nuk ka qenë proporcionale me normat e interesit bazë të Bankës së Shqipërisë, por ka qenë më e lartë.