Bashkimi Europian do të kufizojë hyrjen e qytetarëvë ruse, si hakmarrje ndaj luftës në Ukrainë. Kryediplomati i Bashkimit Evropian, Josep Borrell, njoftoi të mërkurën se ministrat e Jashtëm të bllokut evropian kanë rënë dakord për të pezulluar marrëveshjen për viza me Rusinë. Sipas vendimit që ministrat e unionit morën gjatë një takimi në Pragë, rusët tani do ta kenë më të vështirë sigurimin e një vize europiane dhe procesi do t’iu kushtojë më shtrenjtë. Borrell tha në një konferencë për mediat në fund të takimit dyditor me ministrat e Jashtëm të BE-së se vendimi do të cojë në zvogëlim të numrit të vizave të reja që lëshohen nga vendet anëtare të BE-së. Por ministrat e BE-së nuk kanë arritur të pajtohen për një ndalesë totale për vizat turistike për rusët, pasi vendet anëtare janë të ndara në këtë çështje.