Gjykata e Posaçme ka pranuar kërkesën e SPAK dhe ka kaluar për gjykim dosjen ndaj ish kryetares së komanduar të Bashkisë së Tropojës, Zyra Islamaj. SPAK dorëzoi dosjen ndaj saj në fund të muajit shtetor nën dyshimet se në kohën që ka ushtruar postin e kryetares së komanduar të Bashkisë, ajo ka tentuar të favorizojë ndërtimin e një ure përmes një tenderi publik, me qëllim që kjo vepër të shërbente në interes të familjarëve të saj. Ajo ka kërkuar ndërhyrjen e ndërtuesit Rrok Gegaj, për të ngritur urën mbi përroin pranë banesës së motrës së saj, madje ka planifikuar edhe përfshirjen e një punonjësi të bashkisë për ta ndihmuar. Nga ana e tij, Gegaj ka pranuar se ndërtimi nuk ishte pjesë e procedurave të tenderimit dhe se e konsideronte si një dhuratë për kryetaren e bashkisë. Zyra Islamaj akuzohet për kryerjen e veprës penale “Korrupsion pasiv nga persona që ushtrojnë funksione publike”, ndërsa nga ana tjetër Rrok Gegaj, i akuzuar për “Korrupsion aktiv ndaj personave që ushtrojnë funksione publike”. Çështja ndaj saj nisi pas një kallëzimi të Partisë Demokratike, më 8 janar të këtij viti.