Përplasja mes zyrtarëve ka prodhuar një situatë të pazakontë në Vlorë. Dritan Leli, kryebashkiku socialist i Vlorës i shpallur “non grata” nga PS, ka bërë të ditur se ka shkarkuar drejtorin e ujësjellësit Shkëlqim Leskaj, por ky i fundit refuzon që të lirojë zyrën. Sipas drejtorit të Ujësjellësit, shkarkimi i tij është i paligjshëm, pasi ndërmarrja është aksionere dhe të drejtën për shkarkimin e tij e ka vetëm bordi ekzekutiv. Leli ka ngritur akuzë për Shkëlqim Leskajn për vjedhje të librave të protokollit, vulës së institucionit. Por përmes një reagimi, Leskaj ka mohuar akuzat dhe thotë se vazhdon punën. Një ditë pasi përfundoi në komisariat bashkë me Lelin, përmes një reagimi zyrtar nga Ndërmarrja e Ujësjellësit, Leskaj sqaron se sipas tij, nuk ka pasur asnjë shkelje nga ana e Shoqërisë Ujësjellës Kanalizime Vlorë dhe administratorit të saj, nuk kanë nënshkruar kontrata tenderuese për kontatorët matës së ujit (sahatët), klorinimin dhe uniformat e punonjësve .”Ju bëjmë me dije se nuk ka asnjë ndërprerje të veprimtarisë së Shoqërisë Ujësjellës Kanalizime Vlorë, duke vijuar realizimin normalisht të të gjitha detyrave në shërbim të qytetarëve dhe klientëve tanë, si familjarë ashtu edhe privatë. Drejtori Shkëlqim Leskaj është në krye të detyrës, duke ushtruar kompetencat e tij”, thuhet në njoftimin e drejtorisë së ujësjëllës kanalizimeve të vlorës. Madje po sipas këtij njoftimi thuhet se mëngjesin e së martës drejtori Shkelqim Leskaj ka zhvilluar edhe mbledhjen e përditshme ku janë ndarë edhe detyrat për sektorët përkatës. “Zoti Shkëlqim Leskaj vijon të qëndrojë në detyrë, brenda të gjitha tagrave që i atribuohen sipas legjislacionit në fuqi. Ai vijon të jetë i rregjistruar pranë QKR, si subjekt i legjitimuar në cilësinë e Administratorit të Shoqërisë. Nuk ka patur asnjë “grabitje” nga titullari sa i përketë vulave dhe librave të protokollëve sikundër pretendohet, ato qëndrojnë sipas legjislacionit në selinë e Shoqërisë, vijon më tej njoftimi.