570 turistë kanë mbërritur mëngjesin e kësaj të mërkure, në portin e Sarandës përmes anijes turistike “Seabourn Encore”. Anija mësohet se erdhi nga Galipoli i Italisë për një ndalesë njëditore në qytetin bregdetar dhe do të qëndrojë deri në orën 19:00, për të vazhduar më pas drejt Greqisë, me destinacion në Zakinthos. Turistët kanë kanë zbritur për të vizituar atraksionet kryesore të zonës, përfshirë qytetin e Sarandës, Parkun Kombëtar të Butrintit, Syri i Kaltër dhe destinacione të tjera me interes historik dhe natyror. Vizitat janë zhvilluar me guida të organizuara, sipas planeve të agjencive turistike. Ndalesa e anijes në Sarandë, me një kapacitet prej rreth 600 pasagjerësh, është pjesë e një serie itinerarësh në Mesdhe. Sipas parashikimeve zyrtare, gjatë këtij viti në portin e Sarandës priten rreth 90 ndalesa të tjera të anijeve turistike, duke shënuar një intensifikim të aktivitetit të lundrimeve në këtë pjesë të bregdetit shqiptar.