Kroatët po votojnë për të zgjedhur presidentin e ri, ndërsa sipas sondazheve, presidenti aktual Zoran Millanoviç kryeson. Rivali i tij kryesor në zgjedhjet presidenciale, ku garojnë tetë persona për këtë post gjerësisht ceremonial, është Dragan Primorac, i cili mbështetet nga partia konservatore HDZ, që aktualisht qeveris Kroacinë. Zgjedhjet mbahen në kohën kur shteti, që është anëtar i Bashkimit Evropian dhe NATO-s, po përballet me inflacion të lartë, korrupsion dhe mungesë të fuqisë punëtore. Sipas një sondazhi të publikuar të premten, Millanoviç ka mbështetjen e 37 për qind të elektoratit, ndërkaq Primorac ka mbështetjen e 20 për qind të votuesve. Megjithatë, asnjë nga kandidatët nuk pritet të fitojë më shumë se 50 për qind të votave dhe presidenti i ri pritet të zgjidhet në raundin e balotazhit, që do të mbahet pas dy javësh. Gjatë fushatës, dy rivalët kryesorë kanë këmbyer akuza, me Millanoviçin që është tallur me Primoracin, duke e quajtur “të mërzitshëm”. Presidenti në Kroaci është komandant i forcave të armatosura dhe ka peshë për sa u përket vendimeve për politikën e jashtme.