Kroacia ka nisur këtë të mërkurë zgjedhjet parlamentare që kanë vënë përpara një prove të madhe popullaritetin e kryeministrit Andrej Plenkoviç dhe partisë së tij konservatore në pushtet HDZ, të akuzuar nga kundërshtarët për korrupsion dhe nepotizëm. Bashkimi Demokratik Kroat, HDZ, shpreson të shfrytëzojë mbështetjen e hershme që gëzon në vend për pranimin e Kroacisë në Bashkimin Evropian, përdorimin e euros dhe rritjen e turizmit. Por kroatët janë lodhur nga qeverisja e Bashkimit Demokratik Kroat, e cila ka dominuar politikën e vendit që nga pavarësia e Kroacisë nga Jugosllavia në vitin 1991. Analistët thonë se skandalet e shumta të korrupsionit, përfshirë emërimin nga kryeministri Plenkoviç të një prokurori të njohur për lidhjet me njerëz të përfshirë në marrëveshje korruptive, mund ta dëmtojnë shumicën. Rivali kryesor i Plenkoviç është Presidenti Zoran Milanovic, i cili tha se do të jepte dorëheqjen për t'u bërë kryeministër nëse Partia Social Demokrate (SDP) e merr pushtetin me ndihmën e partive të tjera më të vogla. Nëse pushtetin e merr një koalicion i udhëhequr nga socialdemokratët, kjo mund të ndryshojë qëndrimin e vendit për çështjet kryesore si mbështetja për Ukrainën në luftën e saj me Rusinë. Presidenti Milanovic e kundërshton ndihmën për Ukrainën. Rreth 3.7 milionë votues do të zgjedhin mes më shumë se 2,000 kandidatëve. Rezultatet zyrtare priten gjatë ditëve në vijim.