Me këtë format flete votimi, qytetarët e Tiranës do të shprehin vullnetin e tyre në zgjedhjet e 11 majit. Në fletë janë të shënuara 11 subjektet politike, emri i plotë dhe shkurtimi i tyre, logoja dhe emrat e kryetarëve të partive apo koalicioneve; me shkrim në përmasë më të vogël janë shënuar12 kandidatët e listës së mbyllur dhe me shkrim më të madh 37 kandidatët që garojnë për vota preferenciale në listë të hapur. Kështu në total fleta e votimit përmban 539 emra kandidatësh, prandaj dhe përmasat e fletës do të jenë mjaft të mëdha, konkretisht 58,3 cm me 29,7 cm në të gjitha qarqet. Pasi të mbyllen procedurat e përzgjedhjes së kompanisë që do bëjë printimin, në fillim të javës së parë ose të dytë do fillojë shpërndarja e fletëve në diasporë. Për të shmanguar çdo lloj konfuziteti që mund t’ju shkaktohet zgjedhësve në procesin e votimit, u zgjodh që kandidatët të renditen me emrat e tyre të plotë dhe jo me numra sikurse ndodhi në zgjedhjet e vitit 2021.