Kryeministri i Kosovës, Avdullah Hoti e ka fituar betejën me koronavirusin pas dy javësh në izolim. Këshilltari i tij, Xhavit Beqiri ka dhënë detaje mbi gjendjen e kryeministrit duke thënë se pritet që të hënën ai të kthehet në zyrë. “Gjendja e kryeministrit është e mirë. Nesër pritet të dalë në zyrë, por do tju njoftojmë për detaje”, tha ai për mediat kosovare. Hoti njoftoi se ishte infektuar me koronavirus më 2 gusht. Ai tha atëherë se përveç kollës, nuk kishte simptoma të tjera dhe se do të qëndronte në izolim për dy javë. Por ndërsa konfirmohet shërimi i Hotit, është kryeprokurori i kosovës, Aleksandër Lumezi ai që ka rezultuar së fundmi pozitiv me covid 19. Lajmi u bë i ditur të dielën nga zyra e tij përmes një njoftimi për shtyp, ku thuhej vec të tjerash se Lumezi është në vetëizolim. Sipas deklaratës, gjendja shëndetësore e kryeprokurorit të shtetit është e qëndrueshme dhe ai po merr trajtimin e duhur mjeksor.