Katër viktima u shënuan në Kosovë gjatë 24 orëve të fundit nga koronavirusi, ndërkohë shpresëdhënës duket bilanci I infektimeve të reja: ai është në rënie, me 55 raste. shifrat u bënë publike nga drejtori i Institutit Kombëtar të Shëndetësisë Publike të Kosovës, Naser Ramadani. Në një konferencë për shtyp në Prishtinë, ai tha se është kryer testimi i 574 kampionëve. “Mund t'ju them se kemi rënie të dukshme të situatës epidemiologjike”, deklaroi Ramadani, duke njoftuar edhe shërimin e 150 pacientëve të prekur nga sëmundja. Me shifrat e fundit, numri i përgjithshëm i të infektuarve me koronavirus në Kosovë arrin në porthuajse 14,700. Betejën me Covid 19 në Kosovë e kanë humbur 600 pacientë, ndërsa në vend mbeten aktive edhe 2,507 raste. Valbon Krasniqi, I cili ushtron detyrën e drejtorit të Shërbimit Spitalor dhe Klinik Universitar të Kosovës, njoftoi se në Qendrën Klinike Universitare të Kosovës dhe në spitalet rajonale aktualisht janë duke u trajtuar 319 pacientë, të konfirmuar apo që dyshohet se janë të infektuar me koronavirus.