Qeveria e Kosovës ka themeluar Komitetin për Koordinimin dhe Vlerësimin e situatës me pandeminë e Covid-19, I cili ka në përbërje mbi 25 institucione të Kosovës, të cilat përfaqësohen me nga një anëtar.Ky vendim i Qeverisë, vjen një ditë pas mbledhjes së Këshillit të Sigurisë, i cili diskutoi masat që duhet ndërmarrë për shkak të numrit të lartë të rasteve dhe vdekjeve nga COVID-19. Kryesues i këtij Komiteti do të jetë ministri i Shëndetësisë, Arben Vitia. Kohët e fundit Kosova po përballet më një numër të lartë të vdekjeve më COVID-19 dhe rritje të rasteve të reja me koronavirus. Të hënën në Kosovë u regjistruan 20 viktima dhe 932 raste të reja të të infektuarve me koronavirus. Sipas raportit ditor, 60 pacientë janë në kujdes intensive dhe 1.062 janë duke u trajtuar me oksigjeno-terapi. Për shkak të kësaj situate, Këshilli i Bashkimit Evropian ka konfirmuar heqjen e Kosovës nga lista e vendeve të sigurta, ndaj të cilave nuk ka pasur kufizime për udhëtime në BE për shkak të pandemisë.