Komisioni Qendror i Zgjedhjeve në Kosovë i ka miratuar mbi 70 mijë aplikime për regjistrimin e votuesve jashtë Kosovës për zgjedhjet e parakohshme parlamentare të 28 dhjetorit. Lajmin e ka konfirmuar zëdhënësi i KQZ-së, Vladimir Elezi. “Sipas të dhënave paraprake, gjatë periudhës 11-ditore nga 26 nëntori deri më 6 dhjetor, përmes platformës elektronike të KQZ-së, janë pranuar mbi 84.700 aplikime për regjistrim për votim jashtë Kosovës, prej të cilave janë aprovuar rreth 71.900 ndërkaq janë refuzuar rreth 6.700. Në vlerësim e sipër janë rreth 5.900 aplikime”, tha Elezi. Ai ka bërë të ditur se pjesa më e madhe e votuesve janë regjistruar për të votuar përmes postës, mbi 51.000. Ndërsa rreth 18.000 shtetas janë regjistruar për të votuar fizikisht në ndonjërën nga përfaqësitë diplomatike të kosovës. Në zgjedhjet parlamentare të 9 shkurtit të këtij viti, KQZ-ja kishte regjistruar afro 105 mijë qytetarë në diasporë për të votuar në atë proces.