Kryeministri i Kosovës, Albin Kurti tha në një postim në Facebook se në këtë tri vjet qeverisje, shqiptarët e Preshevës, Medvegjës dhe Bujanocit nuk po lihen në harresë dhe të pambrojtur. Ata tani gëzojnë kujdesin e përkrahjen tonë gjithnjë e më të madhe, çdo vit e më shumë – shkruan ai. Kurti thotë se Presheva, Medvegja dhe Bujanoci kanë një linjë të veçantë dhe të rregullt buxhetore në Buxhetin Vjetor të Kosovës, ndërsa ka përmendur se në vitin 2022 janë ndarë dy milionë euro dhe tani buxheti është tre milionë euro. “Vëmendja jonë dhe ndihma nuk ka munguar as para kësaj. Në qeverisjen tonë të parë, në vitin 2020, patëm ndarë gjysmë milioni euro në përballjen e tre komunave me shumicë shqiptare me pandeminë e koronavirusit. Vitin pasues, kur Komuna e Preshevës u godit nga përmbytjet, ndamë 100 mijë euro mbështetje për rikuperimin e dëmeve”, shkroi Kurti në Facebook. Më tej, Kurti shkruan se janë siguruar libra shkollorë dhe parashkollorë në gjuhën shqipe për nxënësit shqiptarë për vitet 2022 dhe 2023. Ndërsa për 107 studentë janë siguruar 107 bursa studimore. “Me drejtësi, zell dhe shpërndarje të barabartë, dhe me trajtim vëllazëror sa edhe kombëtar, do të jemi gjithmonë adresë, shtëpi dhe krah për shqiptarët në Preshevë, Medvegjë dhe Bujanoc” , përfundon Kurti