Themelimi i Ministrisë së Turizmit në Kosovë është nevojë e domosdoshme për zhvillimin e kësaj industrie, vlerësojnë përfaqësues të sektorit të turizmit në Kosovë. Ata thonë se turizmi është një nga shtyllat kryesore të ekonomisë së një vendi dhe njëkohësisht faktor i rëndësishëm punësimi, ndaj duhet të ketë një institucion të veçantë që merret me zhvillimi e tij. Ndryshe nga vendet e rajonit, turizmi në Kosovë trajtohet si sektor brenda Ministrisë së Industrisë, përmes një departamenti që, sipas profesionistëve të fushës, është i pamjaftueshëm për të adresuar sfidat dhe për të shfrytëzuar mundësitë që ofron kjo industri. Kryetari i Unionit të Turizmit të Kosovës, Baki Hoti thotë se prej kohësh është kërkuar nga institucionet e Kosovës që të themelohet Ministria e Turizmit. Hoti: E domosdoshme që Kosova të ketë Ministrinë e Turizmit "Unioni i Turizmit të Kosovës ka kohë që ka diskutuar dhe ka bërë kërkesa tek institucionet e Republikës së Kosovës, që Kosova të ketë një Ministri të Turizmit...I vetmi institucion që është në kuadër të Ministrisë së Industrisë, Ndërmarrësisë dhe Tregtisë është Departamenti i Turizmit të Kosovës, çka mendojmë që është i pamjaftueshëm për nevojat dhe kërkesat të cilat i ka industria e turizmit...