Disa pjesë të Kosovës mund të përballen me përmbytje pasi parashikohen reshje të dendura shiu gjatë ditës, paralajmëroi Instituti Hidrometeorologjik i Kosovës. Në një njoftim në Facebook, instituti tha se e ka ngritur alarmin në nivelin e verdhë, i cili nënkupton se moti është “potencialisht i rrezikshëm”. Ndërsa niveli i ujit në lumenj në gjithë vendin ka rënie për momentin, pasi ata kishin dalë nga shtrati duke shkaktuar përmbytje në pjesë të vendit më herët gjatë javës, pritet të ketë sërish rritje të nivelit të ujit, thuhet në njoftim. Reshje shiu parashikohet të ketë në pjesët, lindore, verilindore, qendrore dhe jugore të vendit. Ato pritet të ndikojnë në ngritjen e niveleve në Lumin Morava e Binçës me degën kryesore Kriva Reka, të cilat mund të shkaktojnë përmbytje. “Një situatë e tillë do të dominojë edhe në pjesë të tjera të vendit, sidomos në pjesës veri-lindore, qendrore dhe jugore”, thuhet në njoftim. Paralajmërimi vjen pasi në fillim të javës, kryeqyteti i vendit, Prishtina, ndërpreu mësimin në të gjitha shkollat e qytetit, si pasojë e reshjeve të dendura të shiut dhe rrezikut nga përmbytjet. Të hënën dhe të martën u raportua për përmbytje të vogla në pjesë të vendit, të cilat nuk kanë shkaktuar viktima apo dëme të mëdha. Kosova është përballur me përmbytje vitet e fundit, të cilat kanë shkaktuar kryesisht dëme materiale. Vlerësohet se dëmtimi i shtretërve të lumenjve, si pasojë e nxjerrjes së paligjshme të zhavorrit, kontribuon shumë në përmbytjen e zonave.