Sulmi terrorist ndaj infrastrukturës kritike në Kosovë nuk i ka gjetur institucionet e as qytetarët në befasi, thotë ish-deputeti Rrustem Mustafa. Në një intervistë për KosovaPress, Mustafa deklaron se agresioni ruso-serb po përpiqet të gjejë vende të përshtatshme për përshkallëzim. “Ka një kohë që gjendemi para sulmeve ndaj shtetit tonë, nga qarqe përtej Serbisë, të organizuara mirë dhe duke tentuar që të përshkallëzojnë situatën jo vetëm në Kosovë, por edhe në gjithë regjionin. Institucionet me mekanizmat e sigurisë të vendit, sado që janë në nivel detyre, kanë treguar edhe herë të tjera që janë në krye të detyrës. Inteligjenca është duke funksionuar, por prapë se prapë sfida me të cilën përballemi ne, duke e llogaritur krejt se kush qëndron prapa, arritën të bëjnë një dëm të konsiderueshëm.”