Shtetet e Bashkuara të Amerikës kanë deklaruar se Rusia po kërkon mundësi për të shfrytëzuar tensionet ndëretnike në rajonin e Ballkanit Perëndimor, me qëllim që të krijojë destabilitet dhe të pengojë integrimin e rajonit në institucionet euroatlantike. “Është e qartë se Rusia nuk mbështet të ardhmen e njëjtë evropiane për shtetet e rajonit të Ballkanit Perëndimor që ata vetë kanë zgjedhur dhe që njerëzit në rajon e meritojnë”. Ka qenë kjo deklarata që një zëdhënës i Departamentit amerikan të Shtetit ka bërë për Radion Evropa e Lirë. Departamenti amerikan i shtetit tha se për shkak të qëllimit të Rusisë, Uashingtoni po punon me shtetet e Ballkanit Perëndimor që të forcohet bashkëpunimi rajonal dhe të avancohet reformat, në mënyrë që të pakësohet mundësia për ndikimin rus. Në Kosovë udhëheqësit politikë së fundi kanë intensifikuar paralajmërimet e tyre se Serbia po përgatitet për një sulm apo provokim ndaj Kosovës. Në veri, tensionet janë rritur që prej vitit të kaluar, ndërkaq në Bosnje e Hercegovinë, autoritetet në entitetin e Republikës Sërpska kanë kërcënuar me shkëputje. Zëdhënësi i DASH-it tha se SHBA-ja vazhdon të jetë e shqetësuar se tensionet lokale mund të përshkallëzohen në tensione serioze politike në rajon.