Kosova po bëhet gati për një dimër sfidues për shkak të krizës energjetike në botë dhe rritjes së çmimit të importeve që janë të domosdoshme meqë vendi nuk i përballon dot nevojat me prodhimin e brendshëm. Zëdhënësi i Kompanisë për Shpërndarjen e Energjisë Elektrike në Kosovë, Viktor Buzhala, tha se aktualisht çmimi mesatar i energjisë është 500 euro për një megavat, një çmim pesë herë më i lartë se vitin e kaluar. “Tani çmimet janë në qiell dhe është shumë e vështirë edhe të sigurohet energjia elektrike me këto çmime. Ndaj ka të dhëna se na pret një dimër shumë i vështirë”, tha ai. Sipas Buzhalës gjatë dimrit mbi 70 për qind e energjisë elektrike shpenzohet për ngrohje.“Ndryshimet duhet të fillojnë tani, qytetarët duhet t’i përgatisin kaldajat apo sistemet e tyre të ngrohjes për forma alternative, si lëndët djegëse dhe format tjera në mënyrë që të lehtësohet sistemi. Ndryshe, do të jetë shumë e vështirë, pasi që kjo krizë në të cilën vetëm jemi aktualisht, do të vijë duke u thelluar me rritjen e kërkesës dhe rritjen e pritshme të çmimeve”, tha ai. Edhe vetë qytetarët e kosovës, thonë se janë të ndërgjegjshëm për krizën energjetike dhe vështirësitë që i presin.