Bashkimi Evropian ka rikonfirmuar rolin e tij në angazhimin si ndërmjetësues në dialogun Kosovë-Serbi, duke theksuar se po punon me të dyja palët për një marrëveshje gjithëpërfshirëse që adreson të gjitha çështjet e pazgjidhura. Reagimi i Brukselit, ka ardhur pas bisedës së zhvilluar mes presidentit francez Emmanuel Macron, me homologun e tij serb Aleksandar Vuçiç, ku u nënvizua rëndësia e bisedimeve Kosovë-Serbi. “BE-ja pret që Serbia dhe Kosova të përmbushin shpejt angazhimet e tyre ndaj dialogut, duke pasur parasysh lidhjen e drejtpërdrejtë midis normalizimit gjithëpërfshirës të marrëdhënieve dhe perspektivave konkrete për aspiratat e tyre drejt BE-së. Rruga drejt Bashkimit Evropian për të dyja palët kalon përmes Dialogut të lehtësuar nga BE-ja”, u nënvizua nga zyra e shtypit të Komisionit Evropian.