Organizata Transparency International ka vlerësuar Shqipërinë për vitin 2023 me një pikë më shumë se vitin e mëparshëm në Indeksin e Perceptimit të Korrupsionit. Në këtë mënyrë vendi ynë ka shënuar 37 pikë dhe është renditur në vendin e 98-të mes 180 vendeve në listën e korrupsionit. Në raportin e publikuar thuhet mes tjerash se Shqipëria po shënon përmirësim të dukshëm në hetimet që po kryhen si dhe në luftën kundër korrupsionit, duke iu referuar punës së SPAK-ut. Mes vendeve të Ballkanit Perëndimor, Shqipëria radhitet më poshtë sesa Kosova, Maqedonia e Veriut dhe Mali i Zi, ndërsa ka një pikë më shumë se Serbia dhe dy më shumë se Bosnja. Sipas organizatës, bota po përjeton një rënie në funksionimin e sistemeve të drejtësisë dhe vendet që kanë sisteme të dobëta drejtësie kanë nivele të larta korrupsioni.