Në spitalet e përgjithshme në disa komuna të Kosovës, ku po trajtohen pacientët e infektuar me koronavirus, ka mungesë të stafit shëndetësor, thonë drejtues të këtyre spitaleve për radion Evropa e Lirë. Më 18 gusht, Qeveria e Kosovës miratoi një vendim për shtimin e stafit shëndetësor që do të merrej me menaxhimin e pandemisë dhe procesin e imunizimit. Në një përgjigje të sajën, ministria e shëndetësisë tha se 1,116 punëtorë shëndetësorë, do të fillojnë punën gjatë kësaj jave. Ndërkaq, edhe 422 mjekë dhe infermierë të tjerë do të rekrutohen së shpejti. Numri i pacientëve të shtruar në shtatë spitalet e përgjithshme në Kosovë, është aktualisht 799, prej tyre 682 janë të diagnostikuar me koronavirus dhe 642 po trajtohen me oksigjen. Spitali i Pejës kryeson për sa i takon numrit më të madh të pacientëve me COVID-19, gjithsej 210, pasuar nga spitali i Prizrenit me 165 pacientë, ai i Gjilanit me 138 dhe spitali i Gjakovës me 125 pacientë të shtruar. Kosova po kalon aktualisht në një tjetër valë të rëndë të pandemisë. Vetëm të enjten u konfirmuan 32 viktima dhe mbi 1600 raste pozitive me koronavirus. Ndërkohë, për shkak të rritjes së numrit të pacientëve me covid 19, Shërbimi Spitalor Klinik Universitar i Kosovës, ka ndërprerë dhënien e disa shërbimeve spitalore jourgjente në sallat kirurgjike.