Agjencia e inteligjencës e Koresë së Jugut ka gjetur se Koreja e Veriut ia ka dërguar Rusisë 12.000 trupa, përfshirë forca speciale, për ta ndihmuar në luftë kundër Ukrainës, u raportua të premten. Agjencia e lajmeve Yonhap citoi Shërbimin e Inteligjencës Kombëtare të Koresë së Jugut duke thënë se katër brigada të ushtarëve të Veriut janë nisur drejt Rusisë tashmë. Nëse konfirmohet, kjo do të jetë pjesëmarrja e parë e Koresë së Veriut në një luftë të huaj. Koreja e Veriut ka 1.2 milion ushtarë, pra një prej ushtrive më të mëdha në botë, por asaj i mungon përvoja në luftë të vërtetë. Shumë ekspertë e vënë në dyshim faktin nëse trupat e Koresë së Veriut mund ta ndihmojnë Rusinë, duke përmendur pajisjet e prapambetura të Veriut dhe mungesën e përvojës në fushëbeteja. Ekspertët gjithashtu thonë se Koresë së Veriut i është premtuar nga Rusia mbështetje sigurie në konfrontimet e ashpra me SHBA-në dhe Korenë e Jugut për shkak të avancimit të programit të saj bërthamor. Gjatë një takimi në Phenian në qershor, lideri koreanoverior Kim Jong Un dhe presidenti rus Vladimir Putin, nënshkruan një marrëveshje që parashikon ndihmë të ndërsjellë ushtarake nëse ndonjë nga vendet sulmohet. Të enjten, presidenti ukrainas Volodymyr Zelensky tha se Qeveria e tij kishte informacione se 10.000 trupa nga Koreja e Veriut po përgatiten për t’iu bashkuar forcave ruse që luftojnë kundër vendit të tij, duke paralajmëruar se përzierja e një shteti të tretë në luftë mund ta kthejë konfliktin në një "luftë botërore". Sekretari i Përgjithshëm i NATO-s, Mark Rutte, tha se aleanca perëndimore "nuk ka prova se ushtarët koreanoveriorë janë të përfshirë në luftë. Por, ne dimë se Koreja e Veriut po mbështet Rusinë në shumë mënyra, si furnizime me armë, furnizime teknologjike, inovacione, për t'i mbështetur ata në përpjekjet e luftës. Dhe kjo është shumë shqetësuese" – tha ai.