Merr fund makthi për babain e sulmuesit të Liverpoolit, Luis Diaz në Kolumbi teksa ai i la i lirë pas 13 ditësh rrëmbimi, një lajm ky që u konfirmua nga burime policore dhe mediat vendase. Luis Manuel Diaz u rrëmbye në 28 tetor në Barrancas nga anëtarët e Ushtrisë Kombëtare të Clirimit, ELN me këta të fundit që e dorëzuan atë tek zyrtarët e kishës Katolike dhe Kombeve të Bashkuara. Po në 28 tetor u rrëmbye edhe nëna e futbollistit, por ajo u lirua pas vetëm disa orësh. Media kolumbiane bëri të ditur se Luis Manuel Diaz udhëtoi me helikopter ushtarak në drejtim të qytetit Valledupar ku do t’i nënshtrohet një ekzaminimi mjekësor përpara se të bashkohet me familjen e tij. Po kështu media lokale citoi autoritetet që thanë se babai i futbollistit ishte në gjendje të mirë shëndetësore dhe se nuk kishte shenja keqtrajtimi.