Janë dashur vetëm pesë ditë që rekordi për kokrrën më të madhe të breshërit, të thyhej, dy herë. Autoritetet kanë konfirmuar se një kokërr breshëri me diametër 19 centimetra, e rënë në Azzano Decimo të Italisë, ka bërë që të thyhet rekordi në kontinent dhe për vetëm, 1.3 centimetra nuk ka mundur të rrëzojë rekordin botëror. Pesë ditë më parë ndërkohë, në Carmignano di Benta, ishte shënuar rekordi i mëhershëm evropian, me një kokërr vbreshëri me diametër 16 centimetra. Laboratori evropian i stuhive të forta ka kryer matjet dhe ka konfirmuar përfundimet. Rreth orës 23.00 të mbrëmjes së 24 korrikut, qyteza e vogël Azzano Decimo në Itali u godit nga një breshër gjigand që rezultoi edhe në zbulimin e mostrës që theu rekordet. Pas një ekzaminimi të hollësishëm të raporteve dhe fotografive, specialistët nga baza e të dhënave të laboratorit, konfirmuan diametrin prej 19 centimetra të kokrrës së breshërit. E kjo kokërr gjigande ishte shumë pranë rekordit botëror, një kokërr breshëri me diametër 20.3 cm e zbuluar në Vivian të Dakotës së Jugut, në shba, më 23 korrik 2010. Kokrra e breshërit që theu rekordin evropian, u prodhua gjatë stuhisë së dytë të dhunshme që u përplas në italinë e veriut brenda një jave. Stuhitë sollën tornado shkatërrimtarë, që nuk ishin parë kurrë në italinë e veriut më herët, dëshmi të shumta të breshërit gjigand, si edhe i morën jetën të paktën dy personave.