Një tjetër sasi lënde narkotike është sekuestruar mbrëmjen e së mërkurës nga autoritetet policore në portin e Durrësit në kuadër të operacionit të koduar Tranziti. Njësoj si herët e kaluar edhe këtë herë lënda narkotike vinte në me një ngarkesë nga Amerika Latine. Task Forca permanente e përbërë nga Policia Kriminale e Drejtorisë Vendore të Policisë Durrës, Policia Kufitare e Portit të Durrësit dhe autoritetet doganore të Portit kanë ushtruar kontroll në një kamion që vinte nga Brazili brenda të cilit janë gjetur rreth 45 kg lëndë narkotike e llojit kokainë. Droga e sekuestruar ishte ndarë në paketime të vogla 800 deri në 1400 gramësh në ngarkesën me mish pule. Nga burimet, raportohet se porositësi I mishit është një shtetas nga Maqedonia e Veriut. Grupi hetimor, nën drejtimin e Prokurorisë pranë Gjykatës së Rrethit Gjyqësor Durrës, vijon veprimet hetimore për dokumentimin e plotë kësaj veprimtarie kriminale, identifikimin dhe kapjen e personave të përfshirë në të.