Pas gjetjes së një depozite ari me vlerë 80 miliardë dollarë nëntorin e kaluar, gjeologët kinezë pretendojnë se kanë zbuluar një depozitë rekord ari prej 1000 tonësh në verilindje të vendit. Sipas studiuesve, teknologjia e avancuar e kërkimit të mineraleve të Kinës ka lehtësuar zbulimin e këtyre depozitave të mëdha, të cilat janë ndër më të mëdhatë në botë, raporton Independent. Ndërsa Kina është prodhuesi më i madh i arit në botë, me prodhim që arrin afro 380 tonë në vitin 2024, depozitat e saj të arit të provuara mbeten ende pas atyre të Afrikës së Jugut dhe Australisë. Zbulimi i fundit, pritet ta ndihmojë vendin të mbetet konkurrues në prodhimin e arit. Mediat lokale raportojnë se zona e depozitimit shtrihet mbi 3 kilometra nga lindja në perëndim dhe mbi 2.5 kilometra nga veriu në jug. Shumë ekspertë janë skeptikë në lidhje me saktësinë e vlerësimeve të fundit dhe shprehin dyshime për cilësinë dhe minierimin e këtyre depozitave të reja. Ari u lejon vendeve të mbrojnë ekonomitë e tyre në mes të luhatjeve ekonomike globale dhe përdoret gjithashtu në zhvillimin e baterive dhe pajisjeve elektronike.