10 të arrestuarit të rënë në pranga, falë megaoperacionit të SPAK, të shtrirë në qytetin e Tiranës dhe qytete të tjera të vendit kanë dalë këtë të hënë para togave të GJKKO. Të arrestuarit, ku 7 prej tyre ishin shtetas shqiptarë, ishin në rolin e financuesve dhe organizatorëve të trafikut ndërkombëtar të kokainës, ndërsa 3 shtetas ishin latinë, 1 kolumbian dhe 2 venezuelas. Kolumbiani Hiulen Ledezma Narvaez dhe dy vanazuelianët Joze Ramon Zaharias Vaskuez e Samuel Alfonso Moreno Serrano kanë pretenduar se nuk kanë lidhje me trafikimin e kokainës. Ata janë shprehur para gjykatës se kanë ardhur në Shqipëri për turizëm dhe për të mbjellë flokët. Hetimet e SPAK, kishin nisur prej më shumë se një viti. Ngarkesat e kokainës vinin nga Amerika Latine, bënin transit në portet Italiane dhe më pas vinin në Shqipëri, e më pas drejt Bashkimit Evropian. Rrjeti ndërkombëtar kriminal i trafikut të kokainës, transportohej përmes lëkurave të bagëtive, ku fshiheshin qindra kilogram kokainë e pastër, e cila përpunohej në Shqipëri për t’I rritur volumin. SPAK gjeti laborator përpunimi kokaine në Qerekë të Fushë Krujës dhe ambiente ndihmëse në Tiranë dhe Durrës, të cilat ishin vendosur në pika strategjike të infrastrukturës kombëtare si aeroporti dhe porti i Durrësit.