Situata në veri të Kosovës vijon të jetë e tensionuar ,teksa grupet e protestuesve serbë nuk kanë kursyer as mediat, duke sulmuar dhe goditur gazetarë e operatorë në krye të detyrës. Së fundi për këto ngjarje ka reaguar edhe misioni paqeruajtës në Kosovë, KFOR, që ka dënuar sulmet mbi gazetarët e kameramanët në veri të vendit, teksa ka përsëritur edhe thirrjen ndaj palëve për vetëpërmbajtje. “Liria e shtypit dhe liria e shprehjes janë vlera themelore të cilat duhet të respektohen nga të gjithë. Ne u bëjmë thirrje të gjitha palëve që të përmbahen nga dhuna ose veprimet që mund të çojnë në përshkallëzim të mëtejshëm dhe të sigurojnë që mediat të mund të kryejnë punën e tyre themelore në mënyrë të sigurt”, thuhet në komunikatë. KFOR-i ka theksuar se përgjegjëse për sigurimin e sundimit të ligjit në mbarë Kosovën është policia e vendit dhe se misioni ndërkombëtar është vetëm forcë e tretë në reagim. Misioni ka bërë të ditur se komandanti i KFOR-it është në kontakt të rregullt me të gjithë homologët e tij kryesorë, përfshirë përfaqësuesit e institucioneve dhe organizatave të sigurisë në Kosovë, si dhe me përfaqësues të Forcave të Armatosura të Serbisë, për të ndihmuar në uljen e tensioneve.