Misioni paqeruajtës I NATO-s në Kosovë, KFOR, siguron serbët e Kosovës se do të ofrojë siguri për ata që do të duan të udhëtojnë drejt Serbisë për të votuar në zgjedhjet e parakohshme. Lajmi është bërë public nga vetë misioni i KFOR nëpërmjet një postimi në rrjetet sociale. Në postimi në fjalë KFOR-i shpreh përkushtimin të marrë të gjitha masat e duhura në mënyrë që të sigurojë një mjedis të sigurt për të gjitha komunitetet në Kosovë dhe lirinë e lëvizjes gjatë periudhës zgjedhore, në përputhje me mandatin e tij. Komisioni Republikan Zgjedhor i Serbisë, njoftoi se më 17 dhjetor, serbët nga Kosova mund ta ushtrojnë të drejtën e votës në qytetet e Serbisë, Vranjë, Kurshumli, Rashkë dhe Tutin. Ndryshe nga herët e tjera, kur serbët e Kosovës kanë votuar nga komunat e tyre në Kosovë, këtë herë ata nuk u lejuan nga Prishtina zyrtare. Autoritet Kosova u shprehën të vendosura të mos e lejonin një gjë të tillë, për aq kohë sa Serbia nuk kishte bërë një kërkesë zyrtare. Zgjedhjet e 17 dhjetorit në Serbi mbahen në një periudhë kur komuniteti ndërkombëtar po bën përpjekje për normalizimin e marrëdhënieve Kosovë-Serbi, përmes dialogut të lehtësuar nga Bashkimi Evropian. Në të kaluarën zgjedhjet e Serbisë janë mbajtur edhe në Kosovë ku përfshihej misioni i OSBE-së në grumbullimin e votave, të cilat më pas janë dërguar për numërim në Serbi.