KFOR ka dalë me një deklaratë, ku thotë se po vëzhgon me helikopterë dhe dronë kufirin me Serbinë. Misioni ka thënë se këto aktivitete ndihmojnë dhe nxisin ngritjen e sigurisë së qëndrueshme për të gjitha komunitetet dhe për të konsoliduar stabilitetin në rajon. “KFOR-i vazhdon të zbatojë mandatin e tij, duke patrulluar nga ajri vijën kufitare të Kosovës për të kontribuar në një mjedis të qetë dhe të sigurt për të gjithë njerëzit dhe komunitetet që jetojnë në Kosovë dhe lirinë e lëvizjes në çdo kohë dhe në mënyrë të paanshme”, thotë misioni. “KFOR-i vepron si reaguesi i tretë i sigurisë, në koordinim të ngushtë me Policinë e Kosovës dhe misionin e Bashkimit Europian për Sundimin e Ligjit, EULEX, të cilët janë përkatësisht reaguesi i parë dhe i dytë i sigurisë”, theksohet në deklaratë. Njoftimi mbërrin në një kohë që misioni ndërkombëtar ka hasur në kritika për mbrojtjen kufitare, sidomos pas sulmit në Banjskë.