Kryeministri Albin Kurti priti në takim komandantin e KFOR-it, gjeneral major Angelo Michele Ristuccia dhe shefin e EULEX-it, Lars Gunnar Ëigemark, me të cilët ka biseduar për bashkëpunimin e afërt mes Qeverisë së Kosovës, KFOR-it dhe EULEX, brenda mandateve që kanë. Në takim u fol edhe lidhur me veprimet e strukturave kriminale në veri të Kosovës, që cenojnë rëndë sigurinë në vend. Konstatim i përbashkët nga ky takim është se liria e lëvizjes duhet të rivendoset dhe se nuk duhet të ketë barrikada në asnjë rrugë. Gjatë takimit u ra dakord për vazhdimin e bashkëpunimit të ngushtë ndërinstitucional dhe bashkërendimin e veprimeve, në shërbim të paqes dhe sigurisë për të gjithë qytetarët e Kosovës, që është qëllim dhe prioritet i përbashkët i institucioneve të Kosovës, KFOR-it dhe EULEX-it- u tha në një deklaratë nga kryeministria. Po ashtu, në takim u theksua profesionalizmi, maturia dhe guximi i dëshmuar nga Policia e Kosovës, në ruajtjen e sigurisë dhe të rendit publik në mbarë territorin e Republikës së Kosovës.