Kryeministrja japoneze Sanae Takaichi tha të hënën se do të shpërndajë parlamentin këtë javë përpara zgjedhjeve të parakohshme më 8 shkurt, duke shpresuar për një mandat më të fortë për të çuar përpara axhendën e saj ambicioze politike. Udhëheqësja e parë grua e vendit po mbështetet në rezultatet e saj të larta në sondazhe për të udhëhequr Partinë Liberale Demokratike në pushtet, jo fort popullore, drejt fitores. "A është Sanae Takaichi e përshtatshme për të qenë Kryeministre? Do të doja t'i kërkoja popullit sovran të vendoste," tha ajo në një konferencë për shtyp. "Pas shpërbërjes së dhomës së ulët më 23 janar, do të caktohet koha për fillimin e fushatës më 27 janar dhe votimin dhe numërimin më 8 shkurt." Partia liberale demokratike ka qeverisur Japoninë pothuajse pa ndërprerje për dekada, megjithëse me ndryshime të shpeshta të udhëheqësve. Takaichi u emërua kryeministre në tetor dhe kabineti i saj po qëndron lart në sondazhe pavarësisht popullaritetit në rënie të partisë së saj. Blloku qeverisës, i cili përfshin partnerin e koalicionit Partinë e Inovacionit të Japonisë, ka vetëm një shumicë të vogël në dhomën e ulët të fuqishme të parlamentit. Kjo mund të pengojë miratimin e axhendës së saj politike, duke përfshirë shpenzimet fiskale dhe rritjen e buxhetit të mbrojtjes. Zgjedhjet e parakohshme mund edhe ta ndihmojnë Takaichi-n të kapërcejë bllokimin në një grindje me Kinën, duke rritur ndikimin e saj e duke treguar se ajo ka mbështetje të fortë në vend, thonë analistët. Lidhjet midis Tokios dhe Pekinit janë përkeqësuar që kur Takaichi sugjeroi në nëntor se Japonia mund të ndërhynte ushtarakisht nëse Kina do të niste ndonjëherë një sulm ndaj Tajvanit, ishullit të vetëqeverisur që ajo e pretendon si të sajin.