Partitë opozitare në kosovë po bojkotojnë punën e kuvendit. Të mërkurën, deputetët e Partisë demokratike, lidhjes demokratike të Kosovës, aleancës për ardhmërinë e kosovës, refuzuan të merrnin pjesë në komisionet parlamentare pasi një ditë më parë, nuk u përfshi në rendin e ditës krijimi i një komisioni hetimor parlamentar që do të hetonte menaxhimin e krizës energjetike si edhe shkeljet e mundshme në procesin e punësimit në Korporatën Energjetike të Kosovës. Krijimi i komisionit hetimor është kërkuar fillimisht nga Partia Demokratike e Kosovës. Tani deputetët e kësaj partie thonë se nuk do të marrin pjesë në asnjë votim projektligjesh, deri sa komisioni të krijohet. Atyre u janë bashkuar edhe deputetë të tjerë të LDK dhe AAK. Si pasojë e këtij bojkotimi, ka dështuar ndërkohë mbledhja e komisionit për Legjislacion. Të martën, partitë opozitare braktisën sallën e Kuvendit pasi nuk u arrit krijimi i komisionit hetimor. Shefja e Grupit Parlamentar të Lëvizjes Vetëvendosje, Mimoza Kusari – Lila, tha ndërkohë se Ligji për hetimin parlamentar nuk lejon krijimin e komisionit hetimor për krizën energjetike. Ajo tha se kryesues i komisionit duhet të zgjidhet nga partitë që nuk janë iniciuese të themelimit të komisionit. Për këtë ajo inkurajoi opozitën që të kërkojë interpretim në Gjykatë Kushtetuese.