Të shtëna me armë zjarri janë regjistruar mbrëmjen e së shtunës në zonën e ish-Bllokut në Tiranë, ku për pasojë ka mbetur i plagosur një 32 vjeçar. Sipas të dhënave të policisë, personi që ka mbetur i plagosur është 32 vjeçari Ilir Shkurti, i cili ka marrë një plagë në këmbë dhe është dërguar për mjekim më të specializuar në spitalin e Traumës. Dinamika e ngjarjes është e paqarta, por mësohet se në konflikt janë përfshirë disa persona dhe më pas sherri ka degraduar deri në përdorimin e armëve të zjarrit. Policia deklaron se ka ndaluar një nga autorët e dyshuar të ngjarjes dhe mjetin me të cilin ai u largua, ndërkohë që është vënë në kërkim dhe të një personi tjetër. Ngjarja ka shkaktuar panik tek qytetarët pasi ka ndodhur në një nga orët që frekuentohet më shumë për shkak të lokaneve të natës që ndodhen në këtë zonë. Këtë të shtunë po ashtu u gjet trupi i pajetë i biznesmenit Ruzhdi Hoxha në Qafe Mollë, I cili prej disa ditësh ishte zhdukur pa gjurmë. Një natë më parë, një shpërthim me tritol tronditi kryeqytetin. Një person i paidentifikuar vuri një lëndë plasësë në mjetin e noteres së njohur Rezarta Koci.