Policia e Serbisë ka sekuestruar pesë tonë hashash, në fshatin Konjuh, afër Krushevcit në Serbinë qendrore, përmes një operacioni të zhvilluar me 29 janar (2026). Sipas ministrit të Punëve të Brendshme të Serbisë, Ivica Daçiq, ky është sekuestrimi më i madh i drogës në Serbi, vlera e së cilës vlerësohet nga 7 deri në 10 milionë euro. Gjatë aktionit u arrestuan dy shtetas, 68 dhe 40 vjeç, ndërsa vijojnë kërkimet për një person tjetër mbi dyshime se kanë kryer vepra penale për prodhimin dhe posedimin e paautorizuar të narkotikëve dhe për posedim dhe tregtim të paligjshëm të armëve dhe mjeteve plasëse. Përveç lëndës narkotike, Policia serbe ka gjetur armë zjarri, të paktën katër pushkë automatike dhe një raketë që hidhet nga krahu, si dhe para në vlerë prej rreth 12.700 eurosh. Prokuroria Publike për Krimin e Organizuar në Serbi njoftoi se të arrestuarit dyshohen se janë pjesëtarë të një grupi të organizuar kriminal. Sipas autoriteve, grupi i organizuar kriminal e kishte magazinuar marihuanën në hapësirat e e një kompanie prej nga ajo shpërndahej në Beograd. Autoritetet në Serbi thanë se hetimet dhe kontrollet për rastin po vijojnë.