Autoritetet italiane po hetojnë mundësinë që pas 2.3 tonëve kokainë super të pastër që u sekuestrua më 9 janar në portin e Xhenovës të qëndrojë aleanca e grupeve kriminale shqiptare me Ndranghetën. Droga, siç njoftoi më herët Guardia di Finanzia ishte e paketuar në 2109 qese, secila me peshë një kilogramëshe. Dërgesa ishte nisur nga një port i Kolumbisë dhe dyshohet se pjesë e rrjetit, të paktën logjistik të trafikut të jetë bërë edhe një grup shqiptarësh, që janë pjesë e një organizate të trafikut ndërkombëtar të kokainës dhe që kanë baza të forta edhe në Ekuador. Autoritetet italiane thonë se operacioni është rezultat i përpjekjeve intensive të mbikëqyrjes në rrugët tregtare që lidhin, ndër të tjera, Amerikën e Jugut me portin e Xhenovës, i cili historikisht përfaqëson një udhëkryq për flukset tregtare drejt Evropës. 2,380 kilogramët e narkotikëve të sekuestruar, nëse do të hidheshin në treg, do të kishin gjeneruar fitime të konsiderueshme për organizatat kriminale, të vlerësuara në afërsisht 1.5 miliardë euro.