Policia kufitare e Portit të Durrësit ka sekuestruar këtë të mërkurë 70 mijë euro të pa deklaruara. Sasia e parave është gjetur gjatë kontrollit të ushtruar në një autobus të linjës Shqipëri-Itali. Paratë ishin të ndara në 7 pako me nga 10 mijë euro secila. Policia ka vënë në pranga dy shoferët e autobusit ku u gjetën paratë, identitetet e të cilëve ende nuk janë bërë të ditur. Ndërkaq, të arrestuarit po procedohen penalisht për veprën penale “Mosdeklarimi i të hollave në kufi”. Ngjarje të tilla janë bërë mëse të rëndomta në qytetin bregdetar duke qenë se porti i Durrësit prej kohësh është shndërruar në rrugën e preferuar të paligjshmërisë. Dyshimet e para janë se sasitë e parave u përkisnin grupeve kriminale që kanë dërguar lëndë narkotike në Itali dhe që prisnin euro në Shqipëri. Kjo është pista kryesore e hetimeve, e megjithatë shumë pikëpyetje mbeten ende enigmë. Grupi hetimor, nën drejtimin e Prokurorisë së Rrethit Gjyqësor Durrës ka nisur punën për dokumentimin dhe zbardhjen e plotë të kësaj veprimtarie kriminale, si dhe për identifikimin dhe kapjen e personave të tjerë të përfshirë në të.