Kontrolli i Lartë i Shtetit ka konstatuar shkelje ligjore në tendera dhe leje ndërtimi të dhëna në bashkinë e Himarës gjatë vitit 2022. Në raport KLSH rekomandon që gjashtë punonjësve të bashkisë t’u mbahet një e treta e pagës së plotë për një periudhë deri në gjashtë muaj, për tre punonjës të pezullohet e drejta e ngritjes në detyrë përshirë edhe rritjen e pagës për një periudhë deri në dy vjet. Sipas Kontrollit të Lartë të Shtetit, gjatë vitit 2022, Bashkia Himarë në 16 raste ka miratuar leje ndërtimi dhe procedura të tjera në kundërshtim me përcaktimet ligjore në fuqi, Shkelje janë gjetur edhe në tenderin për ndërtimin e kompleksit sportiv rajonal të Borshit, me fond limit 40 milion lekë pa TVSH, për të cilin kërkohet të merren masa për anëtarët e komisionit të vlerësimit të ofertave.