Një 46 vjeçar në Vlorë, i cili kanosi për jetën me armë gjahu bashkëshorten e tij dhe dy vajzat e tyre, është kapur në flagrancë nga efektivët e forcave të posaçme “Shqiponja”. Në finalizim të operacionit policor të koduar ‘Fast’ u bë e mundur parandalimi i ngjarje të mundshme kriminale në familje, që mund të rezultonte në fatalitet. Pas marrjes së njoftimit, se një shtetas po kanoste për jetën, me armë gjahu çifte, bashkëshorten e tij dhe dy vajzat e tyre, në banesë, në lagjen “15 Tetori”, shërbimet e Forcës së Posaçme “Shqiponjat” dhe të Komisariatit të Policisë Vlorë mbërritën menjëherë në vendin e ngjarjes për të bërë të mundur vënien e autorit përpara përgjegjësisë penale. Si rezultat u bë e mundur kapja në flagrancë e 46 vjeçarit me iniciale SH.XH teksa ky i fundit po tentonte të largohej nga vendi i ngjarjes me një motoçikletë. Gjithashtu, u sekuestruam në cilësinë e provës materiale, arma e gjahut çifte me të cilën 46-vjeçari kanosi familjarët, si dhe motoçikleta me të cilën tentoi të largohej. Ndërkohë, vijon puna e grupit hetimor, për sqarimin e plotë të rrethanave të ngjarjes dhe për referimin e materialeve procedurale në Prokurori.