Udhëheqësi i opozitës gjermane Friedrich Merz, i cili supozohet se do të bëhet kancelar në zgjedhjet e muajit të ardhshëm, tha se Gjermania do të shpenzojë më shumë për mbrojtjen, por nuk do të angazhohet për një objektiv të shpenzimeve të mbrojtjes të NATO-s, siç kërkohet nga presidenti i zgjedhur i SHBA-së, Donald Trump. "Së pari duhet të arrijmë kufirin më të ulët prej 2 për qindësh në Gjermani. Nuk e kemi arritur akoma atë", tha Merz të mërkurën në përgjigje të thirrjes së Trump që anëtarët e NATO-s të shpenzojnë 5% të prodhimit të brendshëm bruto për mbrojtjen. "2, 3 ose 5% janë në thelb të parëndësishme, faktori vendimtar është që ne të bëjmë atë që është e nevojshme për të mbrojtur veten," tha Merz, kreu i opozitës Demokristiane dhe favoriti për të pasuar Olaf Scholz. Trump është ankuar shpesh se shumica e anëtarëve të NATO-s nuk po paguajnë pjesën që u takon atyre dhe kërkoi një rritje të kontributeve në NATO gjatë fushatës. NATO vlerësoi ndërkohë se 23 nga 32 anëtarët e saj do të përmbushnin objektivin për të shpenzuar 2% të PBB-së në vitin 2024. Gjermania mundet të përmbushë objektivin aktual të NATO-s prej 2 për qindësh vetëm për shkak të një fondi të posaçëm të akorduar për ushtrinë e vendit, por ka pasiguri se si do të ruhet ky nivel shpenzimesh kur fondi të shterojë në vitin 2028.