Pas marrëveshjes së arritur për anashkalimin e pikës kufitare të Rafah me Egjiptin, në Gaza kanë hyrë kamionët e parë me ndihma. Ata hynë nga jugu i Izraelit ndërsa luftimet e kanë bërë të paqartë situatën pasi ende nuk dihet nëse grupet humanitare do t’i vijojnë misionet apo jo. Egjipti refuzon të hapë anën e vetë të pikëkalimit në Rafah deri në kohën kur kontrolli i kufirit kah ana e Gazës t’i kthehet palestinezëve. Por, ky shtet është pajtuar që përkohësisht ndihma të dërgohet përmes pikëkalimit Kerem Shalom të Izraelit, ku gjendet terminali kryesore e mallrave të Gazës. Marrëveshja për përdorimin e kësaj pike doganore u arrit pas bisedës telefonike të zhvilluar mes presidentit Biden dhe atij egjiptian. Dërgimi i ndihmave në Gaza pothuajse është bërë i pamundur prë shkak të ofensivës që Izraeli po zhvillon në Rafah. Kombet e Bashkuara e kanë cilësuar situatën si tejet të vështirë dhe të rrezikshme pasi grupet humanitare rrezikojnë jetën. Lufta në Gazë mes Izraelit dhe Hamasit – grupit palestinez të shpallur organizatë terroriste nga Shtetet e bashkuara dhe Bashkimi Evropian – nisi pasi Hamasi sulmoi jugun e Izraelit më 7 tetor, duke vrarë 1.200 persona dhe duke rrëmbyer 250 të tjerë. Si pasojë e ofensivës izraelite, në Gazë janë vrarë më shumë se 35.800 palestinezë.