Gjykata e Durrësit ka lënë në burg Xhemal Lokën, bashkëshortin e 41-vjeçares Bedrie Lokës, e cila u vetëvra pak ditë më parë duke u vetëhelmuar me fostoksinë dhe ndërroi jetë në QSUT. Xhemal Loka në sallën e gjyqit ka mohuar akuzat se ka ushtruar dhunë ndaj gruas së tij dhe se e ka shtyrë drejt vetëvrasjes. Loka tha para togave të zeza se debatet në çift janë normale dhe se gruaja e tij nuk e kishte denoncuar ndonjëherë në polici për dhunë. Por sipas Prokurorisë Durrës dëshmitë e fëmijëve dhe pretendimet e familjarëve të viktimës, si dhe videot e gjetura në celularin e të arrestuarit konsiderohen prova për dhunën e vazhdueshme që ushtrohej ndaj 41-vjeçares, e cila përballej prej një viti dhe me thashethemnajën e nxitur kundër saj përmes shpërndarjes së fotove me fyerje në rrjetin social. Gjithashtu pas kqyrjes së banesës së familjes Loka, ka rezultuar se në kotecin e pulave është gjetur një armë zjarri automatike “PPS”, të mbështjellë me një peshqir. Po ashtu në kotec janë gjetur edhe 118 fishekë.