Avioni i parë luftarak i prodhuar në Turqi, Kaan, ka kryer fluturimin e tij testues të mërkurën, në kuadër të përpjekjeve të vendit për të fuqizuar forcat ajrore. Turqia, anëtare e NATO-s, nisi projektin e saj TF-X për të prodhuar një avion vendas luftarak, në 2016-ën. Kompania turke TUSAS firmosi një marrëveshje me britaniken BAE Systems me vlerë 125 milionë dollarë, në 2017-ën për të prodhuar avionin luftarak të gjeneratës së re. TUSAS ndau një video që tregonte një avion luftarak KAAN, që ngrihej në fluturim dhe më pas kthehej në një bazë ajrore në veri të Ankarasë. “Me KAAN, vendi ynë jo vetëm që do të ketë një avion luftarak të gjeneratës së pestë, por edhe teknologjinë që pak vende në botë e kanë”, tha Haluk Gorgun, shef i drejtorisë së industrisë së mbrojtjes në turqi. Avioni i ri ushtarak fillimisht do të pajisety me dy motorë të General Electric F-110, që përdoren edhe në avionët e gjeneratës së katërt të prodhuar nga Lockheed martin, F-16. Turqia synon të përdorë më pas motorë të prodhuar në vend për prodhimin në seri të avionëve KAAN – tha Gorgun, cka pritet të jetësohet në 2028-ën. Turqia së fundmi ka siguruar një marrëveshje për blerjen e 40 avionëve luftarakë F-16 dhe 79 paketa modernizimi për avionët ekzistues të saj F-16, nga SHBA, pas një procesi shumë të vonuar. SHBA vendosi sanksione mbi industrinë turke të mbrojtjes, pavarësisht se vendi është anëtar i NATO-s, në dhjetor 2020, pasi ankaraja bleu sistemet ruse të mbrojtjes raketore S-400 dhe e përjashtoi atë nga programi i avionëve luftarakë F-35, ku turqia ishte prodhuese dhe blerëse në të njëjtën kohë. Ankaraja është e interesuar po ashtu edhe për blerjen e 40 avionëve eurofighter Typhoon, ndërtuar nga një konsorcium i përbërë nga gjermania, britania, italia dhe spanja, përfaqësuar nga Airbus, BAE Systems dhe Leonardo.