Rritja e çmimeve në jug të vendit duket se uli menjëherë kërkesën nga pushuesit duke nisur një fushatë sponsorizimesh në rrjete sociale ku strukturat akomoduese bërë oferta. Në muajin qershor dhe fillimin e korrikut, në jug gjithçka niste nga 60 euro ku i përfshirë ishte vetëm akomodimi, kurse për Ksamilin, çmimi më i lirë ishte 80 euro nata. Operatorët turistikë raportojnë se numri i vizitorëve në Jug të vendit edhe pse në një nivel të mirë nuk është brenda pritshmërive që kishin dhe për këtë arsye numri i strukturave që po ulin çmimet po shtohet dita-ditës. Tashmë për pikun e sezonit, mund të gjesh hotele në Ksamil që ofrojnë paketa “half board” (dy vakte të përfshira) për 65-75 euro personi. Në dhomën dyshe të ofruar për një çmim 130 apo 150 euro ofrohet mëngjesi dhe darka, shezlonet në plazh, parkimi. Sipas operatorëve, më tepër po vihet re mungesa e pushuesve vendas të cilët kanë treguar një tendencë për të rezervuar jashtë në vende si Greqia apo Turqia. Prezenca e ulët është vënë re edhe nga shqiptarët e Kosovës, ku një tjetër arsye është edhe ndikimi i liberalizimit të vizave.