Minatorët e Spaçit do të protestojnë në dalje të autostradës së Kombit të enjten e 27 nëntorit, për të kërkuar jo vetëm kushte dinjitoze pune por edhe transparencë nga shteti shqiptar lidhur me vlerat e çmuara të nëntokës shqiptare, të cilat sipas tyre në shtatë vite me radhë janë nxjerrë pa raportim të qartë dhe në kundërshtim me standardet ligjore. Minatorët e Spaçit shpjegojnë se në një ton koncentrat bakri gjenden si minerale shoqeruese 13 deri 16 gramë ar plus argjend që janë komponentë shoqërues të detyrueshëm në strukturën minerale. Në një deklaratë për mediat, minatorët shpjegojnë se sipas raportimeve të vetë operatorit koncesionar Tete Albania, prodhimi ditor në këtë minierë ka qënë 70 ton koncentrat bakri, që përkthehet në një kilogramë ar në ditë në përbërje shoqëruese . Për periudhën 2018–2025 pra në 84 muaj, sipas të dhënave që minatorët kanë bërë publike, prodhimi teorik i përbërësve të çmuar rezulton të jetë 2016 kilogramë ar.