Drejtësia nuk mund të jetë e verbër ndaj kufijve kushtetues. Kështu shkruan kryeministri Edi Rama, duke cituar arkitektin e akuzës në gjyqin e Nurembergut, Robert Xhekson dhe duke kërkuar që fjalët e tij të jenë udhërrëfyese për pavarësinë e drejtësisë. Mesazhet e përcjella me gjuhën e ish prokurorit të përgjithshëm të Shteteve të Bashkuara, vijnë një ditë pasi Rama i konsideroi akt brutal të ndërhyrjes në pushtetin ekzekutiv, masat e vendosura ndaj Belinda Ballukut dhe qeveria çoi pretendimet për antikushtetueshmëri në Gjykatën Kushtetuese. “Robert Xheksoni i mësoi botës demokratike se kur prokurori kërkon njeriun përpara krimit, drejtësia vdes dhe kur një pushtet hyn në territorin e një tjetri, Kushtetuta demokratike nuk merr më frymë, por mbytet. Ndërsa mua personalisht, ai më ka mësuar diçka tejet frymëzuese për të ecur drejt, vetëm përpara, të cilën asnjë prej baltosësve të mi nuk e kupton dhe s’ka për ta kuptuar kurrë dot, siç fatmirësisht e kupton fare mirë shumica e shqiptarëve. Ky është mësimi madhor i shprehjes së tij lapidare, “Pushteti nuk ka qenë kurrë më i denjë sesa në çastin kur ka pranuar t’i nënshtrohet gjykimit të një drejtësie të pavarur”.