Gjykata Themelore e Prishtinës do të gjykojë këtë të hënë vrasjen e Liridona Ademajt, ngjarje e shënuar më 29 nëntor të vitit 2023, në rrugën “Dalip Alshiqi” në Prishtinë. Më 15 janar, Prokuroria Themelore e Prishtinës njoftoi aktakuzën e ngritur ndaj katër personave për vrasjen e 30-vjeçares Ademaj. Rasti fillimisht u raportua si “grabitje me pasoja të vrasjes”, por dy ditë më vonë autoritetet arrestuan dy persona, ku në mesin e tyre ishte edhe bashkëshorti i Liridonës, Naim Murseli. Tre të akuzuarit e tjerë janë Kushtrim Kokalla, Granit Plava dhe një person i katërt, emri i të cilit nuk është përmendur nga prokurorët kur ata njoftuan për ngritjen e aktakuzës. Prokurorët njoftuan gjatë gjatë konferencës së 15 janarit, se gjatë kohës që çifti jetonte në Suedi, së bashku me dy fëmijët e tyre, kishin pasur “marrëdhënie të trazuar martesore”, si pasojë e të cilave erdhën edhe problemet me pronat.