Partia e ekstremit të djathtë Sanseito doli si një nga fitueset më të mëdha në zgjedhjet e mbajtura në Japoni të dielën, duke fituar mbështetje me paralajmërimet për një "pushtim të heshtur" të emigrantëve dhe premtimet për ulje të taksave dhe shpenzime për mirëqenie. E lindur në YouTube gjatë pandemisë së koronavirusit, duke përhapur teori konspirative rreth vaksinimeve dhe elitave globale, partia hyri në politikë me fushatën e saj "Japonezët të Parët". Partia fitoi 14 vende në parlament ndërkohë që tre vite më parë kishte fituar vetëm një mandat në dhomën e lartë me 248 deputetë. Ajo ka ndërkohë vetëm tre vende në dhomën e ulët, më të fuqishme. Fraza "Japonezët të Parët" kishte për qëllim të shprehte rindërtimin e jetesës së popullit japonez duke i rezistuar globalizmit. “Nuk them se duhet t'i ndalojmë plotësisht të huajt ose që çdo i huaj duhet të largohet nga Japonia", tha Sohei Kamiya, udhëheqësi 47-vjeçar i partisë, në një intervistë me transmetuesin lokal Nippon Television pas zgjedhjeve. Partia Liberale Demokratike e Kryeministrit Shigeru Ishiba dhe partneri i saj i koalicionit Komeito humbën shumicën në dhomën e sipërme, cka i lë ata edhe më shumë të varur nga mbështetja e opozitës pas një humbjeje në dhomën e ulët në tetor. Mesazhi i Kamiya-s tërhoqi votuesit e frustruar me një ekonomi dhe monedhë të dobët që ka joshur turistë në shifra rekord vitet e fundit, duke rritur më tej çmimet që japonezët mezi mund t'i përballojnë, thonë analistët politikë. Kamiya, një ish-menaxher supermarketi dhe mësues anglishteje, i tha Reuters para zgjedhjeve se ishte frymëzuar nga "stili i guximshëm politik" i Presidentit amerikan Donald Trump. Ai gjithashtu ka bërë krahasime me AfD-në e Gjermanisë dhe Reform UK, në Britaninë e madhe, megjithëse politikat populiste të krahut të djathtë ende nuk kanë zënë rrënjë në Japoni, siç kanë bërë në Evropë dhe Shtetet e Bashkuara.