Një 28 vjeçar me origjinë shqiptare, por me shtetësi britanike u dënua me gjashtë vite burg si pjesë e një skeme mashtrimi, ku pretendonte se ishte babai i tetë fëmijëve. Mediat britanike shkruajnë se shqiptari u gjet fajtor në një proces gjyqësor që zgjati rreth 7 muaj. Ai ishte në qendër të skemës së mashtrimit, duke pretenduar atësinë e tetë fëmijëve shqiptarë, të cilët kishin hyrë ilegalisht në Britaninë e Madhe. Hetimet zbuluan se kundrejt shumave të parave, 28 vjeçari shqiptar pretendonte atësinë për të mundësuar regjistrimin e fëmijëve dhe dhënien e pasaportës britanike për ta. Skema e mashtrimit u zbulua pas dyshimeve që ngritën autoritetet kur 28-vjeçari pretendoi atësinë edhe të një fëmije 12 vjeç. Pjesë e skemës ishte edhe një tjerër shqiptar, i dënuar gjithashtu, i cili kishte pretenduar atësinë e 13 fëmijëve jetimë, po shqiptarë. Gjykata tha se të dënuarit kishin abuzuar me aspektet humane të sistemit të azilkërkimit dhe lejeqëndrimit në Britaninë e Madhe dhe për këtë arsye duhej të dënoheshin.