Izraeli ka kryer sulme ajrore në periferitë jugore të Bejrutit, duke thënë se kishte në shënjestër prodhimin e dronëve të Hezbollahut. Sulmi të enjten në mbrëmje, në prag të Kurban Bajramit, një nga festat më të rëndësishme në Islam, pasoi paralajmërimet për evakuim për disa ndërtesa në zonë, ku Hezbollahu është i vendosur. Nuk pati raportime fillestare për të lënduar. Forcat Mbrojtëse të Izraelit (IDF) thanë se kishin identifikuar një njësi të Hezbollahut që prodhonte "mijëra" dronë nën tokë, të financuar nga "terroristë iranianë". Sulmi ndodhi pavarësisht një armëpushimi që është në fuqi midis Izraelit dhe grupit të armatosur për gjashtë muajt e fundit. Kryeministri i Libanit tha se "i dënon fuqimisht" sulmet. "Unë i konsideroj ato si një sulm sistematik dhe të qëllimshëm ndaj atdheut tonë, sigurisë, stabilitetit dhe ekonomisë së tij, veçanërisht në prag të festave dhe sezonit turistik", tha Naëaf Salam në një postim në X. Mijëra njerëz u larguan nga zona me popullsi të dendur pas paralajmërimit për evakuim, duke shkaktuar një bllokim të trafikut. Re tymi u shfaqën më pas në qiell. Presidenti libanez Joseph Aoun i përshkroi sulmet si një "shkelje flagrante të një marrëveshjeje ndërkombëtare", ndërsa vuri në dukje se ato kishin ndodhur "në prag të një feste të shenjtë fetare". Sulmet "ngjallën panik dhe frikë në prag të Kurban Bajramit", shkroi Zyra e Koordinatorit Special të Kombeve të Bashkuara për Libanin në X duke paralajmëruar për rrezikun e përshkallëzimit të panevojshëm të situatës. Ministri izraelit i Mbrojtjes, Israel Katz, vlerësoi "ekzekutimin perfekt" të sulmeve nga ushtria, duke thënë se Izraeli e konsideron qeverinë libaneze "drejtpërdrejt përgjegjëse për parandalimin e shkeljeve të armëpushimit dhe të çdo aktiviteti terrorist".